ESQUERDA UNIDA DE VIGO PRESENTOU O SEU PROGRAMA DE CULTURA E DE DEFENSA DA LÍNGUA GALEGA

Publicado o Maio 17, 2011 por euvigo

Esquerda Unida de Vigo presentou o seu programa de cultura e de defensa da língua galega alertando de que a crise tamén afecta á cultura e a promoción da nosa língua.

Rubén Pérez, candidato de EU ao Concello de Vigo e Xesús Alonso Montero, Catedrático da Lengua Galega e membro da candidatura de EU ao concello de Vigo suliñaron que a cultura é un sector que pode crear emprego e riqueza tamén dende o municipalismo. 

ESQUERDA UNIDA defende unha cultura como espazo de socialización e de prestixio do colectivo, educadora da cidadanía nun lecer crítico e creativo fronte ao patrón consumista e individualista. Igualmente é garantía de reafirmación das nosas raíces de identidade como galegos, orgullosos dun idioma nin mellor nin peor que outros, simplemente noso. ESQUERDA UNIDA defenderá en propostas de cultura e defensa da lengua as seguintes prioridades: 

  • Programas integradores e de calidade, dende o público e coa complicidade do tecido sociocultural da cidade. 
  • Apoio municipal a salas, locais, bares, etc… que programan alternativas culturais e que non teñen prácticamente apoio municipal. 
  • Loitar contra a cultura espectáculo (Cow Parade, Regata Cutty Sark …) que dilapidan millóns de euros sen xenerar tecido cultural e defender activamente a micropolítica cultural. 
  • Ampliación da rede de CASAS DA CULTURA, creación dun ATENEO CULTURAL VIGUÉS e dotar aos barrios que non dispoñen deles un centro cívico (barrios como Lavadores, Beade, Valladares, etc…). 
  • Creación dunha TV PUBLICA e RADIO PÚBLICA viguesa que dinamice especialmente a cultura e a información plural. 
  • WIFI en todo o térmo municipal gratuito. 
  • Loita contra a SGAE e denuncia municipal dos seus abusos. 
  • Defensa da lengua galega en tódolos ámbitos públicos, evitando que sexa un arma política entre partidos e axudando que sexa o concello a verdadeira arma de inmersión lingüística integradora. 
  • Impulsar de espazos culturais de contido feminista nas novas radio e televisión públicas. 
  • Fomento dos ciclos culturais de cine aproveitando as xinerxias locais como LUMIERE ou a ALIANZA FRANCESA.

Arquivado en: Noticias | Etiquetado: ,,, | Deixar un comentario »

Esquerda Unida de Vigo denuncia os despidos na musealización do Castro de Vigo

Publicado o Febreiro 11, 2011 por euvigocom

ESQUERDA UNIDA DENUCIA OS DESPIDOS DE PERSONAL NAS MUSEALIZACIÓNS DO CASTRO DE VIGO E A FINCA MIRAMBEL E CONSIDERA INEXISTENTE O PLAN MUSEISTICO ANUNCIADO POLA TENENCIA DE ALCALDÍA.

 

O coordenador local e candidato á alcaldía en 2011, Rubén Pérez, recorda que so coa partida de cartos asignada a axendas en 2011 polas concellerías do BNG se mantiñan todos os postos de traballo nas dúas musealizacións durante un ano.

O Castro

O coordenador local e candidato á alcaldía en 2011, Rubén Pérez, denuncia que a escusa do peche por reformas do museo do poblado do Castro en decembro era en realidade o peche por falla de planificación a hora de asignar recursos e personal ao museo do Castro. Actualmente somentes traballa un arqueólogo na musealización co que se suspenderon as visitas guiadas que requiren alomenos dous especialistas. Igualmente denuncia que co despido do garda xurado contratado a empresa VINSA somentes hai unha persona na musealización de Mirambel sendo inexistentes as visitas guiadas explicativas.

Para ESQUERDA UNIDA o concello asfixiou á empresa contratada para a xestión do museo do castro sen pagarlle durante meses provocando os despidos dos arqueólogos e o vixiante. Incluso coa renovación do convenio en agosto seguíu incumplindo o pago do acordado para a xestión do entorno musealizado.

ESQUERDA UNIDA cuestiona o gasto de 1 millón de euros na musealización do castro porque entronca coa mania que ten o PSOE e o BNG de levantar museos pero non dotalos de orzamento nin personal co que a cidadanía de Vigo o que acaba tendo e un “continente valeiro de contido”. É un exemplo máis da nefasta política cultural e de fomento do
patrimonio histórico deste goberno bipartito.

A magnífica acollida da cidadanía viguesa do poboado musealizado do Castro (máis de 10.000 visitas en catro meses) demostra que nin siquera con voa vontade de disposición da nosa cidadanía a coñecer o seu patrimonio histórico o Concello planifica e optimiza os recursos.

 

Gabinete de Prensa
Secretaría de Comunicación
Executiva Local de Esquerda Unida

Arquivado en: Noticias | Etiquetado: ,,,,, | Deixar un comentario »

Esquerda Unida saúda a cidadanía galega que saíu masivamente a rúa para defender civicamente a súa lingua e a súa cultura ante o ataque do goberno do PP

Publicado o Maio 18, 2010 por euvigo

EU VALORA COMO UN GRANDE ÉXITO A MANIFESTACIÓN EN DEFENSA DA LINGUA GALEGA E CONTRA O DECRETO, FALAZMENTE ALCUMADO DO PLURILINGÜISMO

ESQUERDA UNIDA ENTENDE QUE TANTO O PRESIDENTE DA XUNTA COMO O PP DEBEN DAR MARCHA ATRÁS AO DECRETO CONTRA O GALEGO ANTE O UNÁNIME CLAMOR POPULAR

Nun ambiente festivo entre sons de tambores, pandeiretas e gaitas, 100.000 galegas e galegos convocados pola plataforma Queremos Galego manifestáronse civicamente a prol da lingua e a cultura galega. A manifestación partiu da Alameda compostelá encabezada pola pancarta principal sostida, entre outros, por Carlos Callón, portavoz de Queremos Galego e Yolanda Díaz, Coordinadora Nacional de Esquerda Unida organización que forma parte da plataforma.

Esquerda Unida valora como un grande éxito a manifestación e considera que o 17 de maio de 2010, día das letras galegas, pasará aos anais da historia como a data na que o pobo galego saíu masivamente a rúa para defender a súa lingua e a súa cultura do ataque sen precedentes que o Goberno do PP está a executar mediante o decreto contra o galego, xa que logo, supón un recorte dos dereitos lingüísticos dos galegos e galegas como así o indican diversos informes xurídicos como o díctame do Consello Consultivo que indica que o decreto que pretende aplicar o Executivo galego é ilegal e inconstitucional.

EU entende que tanto o presidente da Xunta como o PP están solos e illados na súa política lingüística, polo que deben dar marcha atrás e retirar o decreto contra o galego. Non só polo unánime clamor popular amosado polo pobo galego, senón tamén porque o decreto atópase fora do ordenamento xurídico, constitúe un ataque político sen precedentes contra a lingua e a cultura galega e racha co consenso acadado durante toda a historia do autogoberno galego, levado acabo a través da Lei 3/1983 de Normalización Lingüística e mailo Plan Xeral de Normalización Lingüística aprobado en setembro de 2004, sendo Vicepresidente da Xunta o propio Feijóo.

As bases do decreto producirán consecuencias negativas para a nosa lingua, o alumnado e a propia sociedade. A lingua galega, minorizada pola imposición secular dun poder político alleo as necesidades e arelas do pobo galego, require, para facer efectiva a súa normalización, ser a lingua vehicular na escola; a actual lexislación (decreto 124/2007) aínda sendo insuficiente para conquerila como non deixan de pór en claro os diversos estudos e informes sociolingüísticos realizados, supuña un paso adiante pois é un feito cientificamente demostrable que as linguas febles como a galega necesitan da discriminación positiva para garantir a competencia do alumnado, como así o recolle o Informe do Consello da Cultura Galega, que advirte de que “en ningún caso se deben tomar medidas que supoñan pasos atrás no proceso de recuperación do galego” e que a nosa lingua “precisa dun apoio especial para superar a súa posición actual de desvantaxe”. Con todo o “decretazo lingüístico do PP” apunta cara a progresiva desaparición do galego como lingua viva e de cultura, na procura do pensamento único tan característico dos gobernos neoliberais.

A nosa organización reclama abrir un amplo diálogo social para conquerir unha plena e eficaz aplicación da lei e do plan de normalización lingüística no que ninguén se sinta excluído, polo que en aras da concordia e o entendemento solicita ao PP a retirada do decreto, falazmente alcumado do plurilingüismo.

Gabinete de Prensa
Secretaría de Comunicación
Executiva Nacional de Esquerda Unida

Arquivado en: Noticias | Etiquetado: ,,,,,,, | 1 Comentario »

Esquerda Unida participará con faixa propia na manifestación en defensa da nosa lingua e contra o decretazo, e chama a todos os galegos e galegas a manifestarse

Publicado o Maio 16, 2010 por euvigo

EU REXEITA ROTUDAMENTE O DECRETO CONTRA O GALEGO, AO CAL CONSIDERA UN ATAQUE POLÍTICO SEN PRECEDENTES CONTRA A NOSA LINGUA E A NOSA CULTURA

Esquerda Unida, movemento político-social que forma parte da plataforma Queremos Galego, participará con faixa propia na manifestación nacional do 17 de maio, día das letras galegas, convocada pola dita plataforma en defensa da nosa lingua. A manifestación partira da compostelá praza da Alameda as 12 de mañá e rematará na praza do Obradoiro.

A nosa organización considera o decreto contra o galego do goberno do PP, un ataque político sen precedentes contra a nosa lingua e a nosa cultura. O devandito decreto traerá consecuencias negativas para a nosa lingua, o alumnado e a propia sociedade.

Esquerda Unida denuncia que o decreto, ademais de ser inxusto, incumpre toda normativa de rango superior ao contravir a proteción do galego. Este decreto traerá como consecuencia a paulatina desaparición do galego, pois cando se pretende equipar dúas linguas en situación de desigualdade, sucede que a máis débil desaparece, como así o recolle o Informe do Consello da Cultura Galega, que advirte de que “en ningún caso se deben tomar medidas que supoñan pasos atrás no proceso de recuperación do galego” e que a nosa lingua “precisa dun apoio especial para superar a súa posición actual de desvantaxe”. Con todo, o PP pretende impor a sociedade galega, rachando o consenso histórico, un decreto elaborado de costas a sociedade e a comunidade educativa.

Esquerda Unida que participará activamente na manifestación do vindeiro 17 de maio chama a mobilización de todos os galegos e galegas en defensa da nosa lingua, para visualizar a unidade social existente neste momento arredor da defensa do galego e demostrarlle ao PP que está a actuar de costas a sociedade galega.

EU confía en que milleiros de galegas e galegos ateiguen de novo a praza do Obradoiro, como xa acontecera na masiva manifestación contra o decretazo no ensino do pasado 21 de xaneiro, para facer reflexionar ao Presidente da Xunta, que no entanto segue a malgastar diñeiros públicos en atacar o galego. Neste senso Esquerda Unida considera inaceptable que, en plena crise económica cando semella fundamental facer un uso racional do gasto público, o Goberno do PP invista un millón de euros nunha campaña a favor do decretazo, e dicir en contra do galego.

Gabinete de Prensa
Secretaría de Comunicación
Executiva Nacional de Esquerda Unida

Arquivado en: Manifestos,Noticias | Etiquetado: ,,,,,,, | Deixar un comentario »

14 de Abril

Publicado o Abril 13, 2010 por euvigo

Arquivado en: Noticias | Etiquetado: ,,,,,,, | Deixar un comentario »

Carlos Portomeñe e Rubén Pérez do Comité Executivo do Partido Comunista de Galicia inician o Luns unha visita oficial a República de Cuba

Publicado o Marzo 12, 2010 por euvigo

A delegación estará composta por Carlos Portomeñe, secretario xeral e Rubén Pérez, responsable de movemento obreiro e coordenador local de EU-Vigo. A delegación, que viaxará a illa entre o 15 e o 25 de marzo, ten artellado un calendario de traballo que inclúe dende unha xuntanza de traballo no comité central do PARTIDO COMUNISTA DE CUBA ate a asistencia a un debate de elección de candidatos no importante proceso electoral que se iniciou na illa recentemente, pasando pola presentación na cidade da Habana do documental TEMPO DA MEMORIA producido polo FORO POLA MEMORIA e dirixido por Jorge Gil sobre a vida do dirixente comunista Xosé Gomez Gayoso asasinado polo franquismo en 1948.

Ademáis visitará o hospital pediátrico de Tarará donde dende 1896 se atenderon a máis de 24.000 nenos afectados polo accidente nuclear de Chernovil.

Carlos Portomeñe, secretario xeral do PCG, suliñou a importancia da visita, nun contexto político de grave acoso diplomático a Cuba por parte da U.E. e do goberno español, como exemplo da solidariedade dos comunistas galegos con Cuba e o seu proceso revolucionario.

Secretaría de Comunicación do PCG

Arquivado en: Noticias | Etiquetado: ,,,,,,,,, | Deixar un comentario »

Esquerda Unida lamenta que a mesa do Parlamento Galego rexeite a admisión a trámite da iniciativa lexislativa popular que pretendía garantir os dereitos lingüisticos na Galiza

Publicado o Marzo 9, 2010 por euvigo

PARA EU A POSICIÓN ADOPTADA POLOS MEMBROS DA MESA DO PP E DO PSOE, QUE SE OPUXERON AO SEU TRÁMITE, AMOSA O SEU CLARO DESINTERESE POLA CULTURA E A LINGUA GALEGA

A PLATAFORMA QUEREMOS GALEGO MANTERÁ O SEU CALENDARIO DE ACCIÓNS E RECOLLIDA DE FIRMAS COMO SE A ILP ADMITÍRASE A TRÁMITE

Onte coñeceuse a triste nova do rexeitamento pola mesa do Parlamento galego da admisión a trámite da Iniciativa Lexislativa Popular (ILP) rexistrada o pasado luns 8 de febreiro de 2010 pola Plataforma Queremos Galego, da que forma parte Esquerda Unida, co propósito de garantir os dereitos lingüísticos que a plataforma está a defender nos últimos meses.

Esquerda Unida lamenta enormemente a posición adoptada polos membros da mesa do PP e do PSOE que se opuxeron ao tramite da devandita ILP, o que ao noso entender amosa con claridade o desinterese pola cultura e a lingua galega de ámbolos dous partidos políticos. Posición comprensible no PP, non en vano lanzou o “decretazo” contra o galego, pero inexplicable no PSOE que se manifestou na defensa da lingua galega.

Para EU a actitude do PSOE ven a demostrar que o interese pola lingua galega amosado tempo a tras durante as mobilizacións cidadás, tiña máis que ver con estratexias electoralistas que polo verdadeiro interese na defensa da cultura e a lingua galega. A actual incoherencia do PSOE, partido político que se di de esquerdas, amosa a súa habitual liña de actuación populista, prometendo cara a opinión pública e incumprindo nas institucións cando o tema en cuestión perde capacidade mediatica. Unha forma de facer política que Esquerda Unida rexeista con rotundidade.

Esquerda Unida quere recordar que a dita ILP pretende facer efectivos os dereitos lingüísticos do pobo galego, dando cumprimento ao deber de fomento do uso do galego na vida pública para que a nosa lingua propia acceda a ámbitos institucionais e privados dos que tradicionalmente estivo excluída, nun momento en que a grave perda de falantes aconsella a adopción de medidas urxentes con rango de lei formal como recollen os compromisos internacionais derivados da Carta europea de linguas rexionais e minoritarias de 1992, ratificada polo Estado español en 2001, e o acordo unánime do Parlamento de Galiza.

Así pois a Plataforma Queremos Galego manterá o seu calendario de accións e recollida de firmas como si a ILP admitírase a trámite para demostrar tanto ao PSOE como ao PP que están a actuar de costas a cidadanía galega.

Gabinete de Prensa
Secretaría de Comunicación
Executiva Nacional de Esquerda Unida

Arquivado en: Manifestos,Noticias | Etiquetado: ,,,, | Deixar un comentario »

O DOURADO CUBANO

Publicado o Marzo 3, 2010 por euvigo 
Rubén Pérez
Coordenador local de Esquerda Unida en Vigo
Un turista en Cuba establece unha conversación cun cidadán cubano na Habana. En certo momento, alentado xa o autóctono pola rápida confianza que se toman os orixinais do Caribe, interrompe ao turista e, sacando do peto un recorte do xornal, dille:

-Oe irmán, quería ensinarche isto que levo desde fai tempo reflexionando

O turista observa o anaco de papel e interpreta que se trata dunha páxina de breves dun xornal de tirada nacional español. O cubano sinálalle especialmente un anuncio do mesmo que pon “muller executiva española paga por sexo” acompañado dun teléfono.

-¡Isto é o paraíso!,- di o cubano emocionado- levo tempo querendo ir a España e chamar a esta señora.

O turista ao principio cala. Prefire non desilusionar ao cubano, porque este, sen darse conta, está recibindo a súa primeira dose de realidade. Desa realidade que mostra que o capitalismo, como os anuncios de contactos na prensa, MENTEN. Logo reflexiona que o seu silencio pode provocar unha fuxida despavorida ao dourado do sexo pagado por ricas executivas que é España e explícalle que é un fraude, que o teléfono é un teléfono de tarificación especial e que a executiva será un administrativo ou teleoperador dunha compañía con sede nun baixo comercial calquera.

O cubano indígnase:

- ¡Pero isto non pode ser! Como van aparecer fraudes deste tipo nun DIARIO OFICIAL?, non irmán, ti non queres que vaia ao teu país porque sabes da fogosidade dos cubanos.!

O turista vese incapaz de explicarlle que en España os diarios non son oficiais como o Granma, senón expresión de oligopolios económicos con múltiples intereses prioritarios antes que verificar a veracidade dos anuncios de contactos ou a moralidade da súa inserción. E non quere moito menos explicarlle quen é Dinio e a súa homérica vida.

Esta historia real cóntama onte un compañeiro como anécdota simpática tomando un viño. Todos podémonos rir da inxenuidade coa que unha persoa dun país como Cuba ten ante os cantos de serea que aquí recibimos todos os días.

Esencialmente isto é o que preocupa do que pasa en Cuba. Á illa, como botellas arrastradas pola marea, chegan miles de cantos de serea, en forma de automóbiles caros no canto de antiguallas dos 50, de teléfonos móbiles, de roupa cara, de restaurantes de luxo, de mulleres caucásicas ofrecendo sexo por diñeiro. De vida de luxo sen traballo, sen esforzo. De festas infinitas nese dourado cubano que tamén é Miami.

Que máis dá ter a taxa de analfabetismo máis baixa do continente, o coeficiente de médicos máis alto por habitante, a mortalidade infantil por baixo das grandes potencias mundiais, o equilibrio ambiental máis estable segundo a ONU, o alimento e a vivenda asegurada nun continente onde iso é un luxo e polo tanto un privilexio de poucos. Todo iso no prato da balanza non pesa o que no outro prato deixa un bo “polvo” pagado por unha branca executiva.

Confío que este cubano algún día comprenda que ese dourado anhelado, cabe, como dixo o seu compatriota José Martí sobre as verdades elementais, na á dun colibrí.

Tan só niso.

Arquivado en: Manifestos | Etiquetado: ,,,, | Deixar un comentario »

Esquerda Unida reclama unha dotación orzamentaria propia e estable para fornecer o traballo da Academia Galega e atender a súas necesidades

Publicado o Febreiro 19, 2010 por euvigo

YOLANDA DÍAZ CONSIDERA INAUDITO QUE UNHA INSTITUCIÓN DO VALOR, HISTORIA E COMETIDOS COMO A DA ACADEMIA NON RECIBA UN CAN DAS INSTITUCIÓNS DO PODER GALEGO

A NOSA ORGANIZACIÓN RECLAMA QUE NO VINDEIRO ORZAMENTO SE CRE UNHA PARTIDA ESPECÍFICA PARA UNHA INSTITUCIÓN SENLLEIRA DO NOSO PAÍS

Esquerda Unida manifesta a súa reclamación a prol dunha dotación orzamentaria propia, estable e suficiente para garantir os cometidos e obxectivos, valiosos e ambiciosos de seu, da nosa Academia Galega.

A Coordinadora nacional de Esquerda Unida, Yolanda Díaz, subliñou o feito inaudito de que unha Academia, que cumpre funcións indispensables para a nosa lingua e cultura e que acubilla unha bagaxe histórica incalculable para o noso país, non conte cun patacón dos orzamentos da comunidade. Yolanda Díaz afirmou que tal realidade deixa en moi mal lugar aos sucesivos Gobernos da Xunta.

As finalidades da Academia Galega son merecentes dun tratamento específico nos orzamentos galegos, que permita tanto atendelas canto subvenir de maneira axeitada aos gastos de mantemento do inmoble e de funcionamento da Academia. A realidade é que a situación , denunciada pola propia institución, valga o exemplo do tellado non é aceptable e deixa en evidencia o desleixo deste Goberno e dos anteriores coa institución de Fontenla Leal, ferrolán egrexio, Curros Enríquez e Manuel Murguía.

EU reclama a dotación dunha partida extraordinaria para atender as necesidades inaprazables e urxentes da Academia. A maiores, Yolanda Díaz reclamou que se habilite no vindeiro orzamento unha partida propia adicada a fornecer unha institución insustituible para a nosa nación.

Gabinete de Prensa
Secretaría de Comunicación
Executiva Nacional de Esquerda Unida

Arquivado en: Manifestos,Noticias | Etiquetado: ,,, | Deixar un comentario »

Esquerda Unida apoia as mobilizacións en contra do decreto do Galego e na defensa da nosa lingua e chama a cidadanía a manifestarse

Publicado o Xaneiro 19, 2010 por euvigo

EU REXEITA AS BASES PARA O DECRETO E AS CONSIDERA UN ATAQUE POLÍTICO SEN PRECEDENTES CONTRA A NOSA LINGUA E A NOSA CULTURA

ESQUERDA UNIDA RECLAMA A RETIRADA DAS DEVANDITAS BASES E A APERTURA DUN AMPLO DEBATE SOCIAL PARA CONQUERIR UNHA PLENA E EFICAZ APLICACIÓN DA LEI E DO PLAN DE NORMALIZACIÓN LINGÜÍSTICA

Esquerda Unida, organización política que forma parte da plataforma Queremos Galego, saúda a convocatoria de folga no ensino convocada por distintas organizacións sindicais como CCOO, STEG ou CIG para o vindeiro xoves 21 de xaneiro na defensa da nosa lingua, ao tempo que anuncia o apoio á manifestación que se iniciará na compostelá praza da Alameda as 11:30 h.

A nosa organización considera o decreto contra o galego, que pretende aprobar o goberno do PP, un ataque político sen precedentes contra a nosa lingua e a nosa cultura. O devandito decreto traerá consecuencias negativas para a nosa lingua, o alumnado e a propia sociedade.

Esquerda Unida denuncia que o decreto, ademais de ser inxusto, incumpre toda normativa de rango superior ao contravir a proteción do galego. Este decreto traerá como consecuencia a paulatina desaparición do galego, pois cando se pretende equipar dúas linguas en situación de desigualdade, sucede que a máis débil desaparece,
como así o recolle o Informe do Consello da Cultura Galega, que advirte de que “en ningún caso se deben tomar medidas que supoñan pasos atrás no proceso de recuperación do galego” e que a nosa lingua “precisa dun apoio especial para superar a súa posición actual de desvantaxe”.

Nembargantes, o PP pretende impor a sociedade galega, rachando o consenso histórico, un decreto elaborado de costas a sociedade e a comunidade educativa, como mostra o feito de que o Goberno da Xunta de Galicia aprobou o borrador das bases do decreto, con premeditación e nocturnidade, en plenas festas do Nadal para evitar a contestación da comunidade educativa.

Esquerda Unida participará na manifestación do vindeiro 21 de xaneiro e chama a mobilización da cidadanía, especialmente a comunidade educativa, para demostrarlle ao PP que está a actuar de costas a sociedade galega.

A nosa organización reclama abrir un amplo diálogo social para conquerir unha plena e eficaz aplicación da lei e do plan de normalización lingüística no que ninguén se sinta excluído, polo que en aras da concordia e o entendemento
solicita ao PP a retirada das bases do decreto, falazmente alcumado do plurilingüismo.

Gabinete de Prensa
Secretaría de Comunicación
Executiva Nacional de Esquerda Unida

Arquivado en: Manifestos,Noticias | Etiquetado: ,,, | Deixar un comentario »

  • Campaña da Auga

  • Twitter EU-Vigo

  • Ingrese a súa dirección de correo electrónico para subscribirse a este blogue e recibir notificacións de novos artigos por correo electrónico.

    Únete aos outros 35 segidores

  • Europeas

  • Web oficial

    Páxina oficial de Alternativa Galega de Esquerda
Seguir este blog

Recibe aviso de cada artigo novo no teu correo electrónico.

Únete aos outros 35 segidores

%d bloggers like this: